ლიგა 2-ის მეცხრე ტურში „მწვანეებმა“ სტუმრად „მონპელიე“ 2:0 დაამარცხეს, და ორივე გოლის ავტორი სწორედ დავითაშვილი იყო. ქართველმა ფეხბურთელმა მატჩის ბედი ფაქტობრივად პირველ ნახევარში გადაწყვიტა — ჯერ მეორე წუთზე ზუსტად შეიჭრა მარჯვენა ფლანგიდან საჯარიმოში და ბურთი მეკარესთან ერთად კარში შეაგორა, ხოლო 23-ე წუთზე თანაგუნდელის შესანიშნავი პასის შემდეგ ძლიერი დარტყმით გაიტანა მეორე გოლი.

მომდევნო წუთებში „სენტ ეტიენი“ თამაშს სრულად აკონტროლებდა, ზურიკო კი კვლავ ერთ-ერთი ყველაზე აქტიური ფიგურა იყო მოედანზე. 87-ე წუთამდე ითამაშა, ყვითელი ბარათიც მიიღო. sofascore-ის მიხედვით დავითაშვილი მატჩის საუკეთესო ფეხბურთელად დაასახელდა.

დავითაშვილის ანგარიშზე ამ დროისთვის უკვე ოთხი გოლია Ligue 2-ში, რაც მას გუნდში საუკეთესო ბომბარდირად აქცევს. ბელგიელ ლუკას სტასენთან ერთად ის „სენტ ეტიენის“ თავდასხმის მთავარი ძალაა. კლუბს კი ამ გამარჯვებით 20 ქულა დაუგროვდა და ლიგის ლიდერობას ინარჩუნებს.

მატჩის შემდეგ ეირიკ ჰორნელანმა, „სენტ ეტიენის“ მთავარმა მწვრთნელმა, ქართველი შემტევის თამაში განსაკუთრებულად შეაფასა:

„დიდი მონდომებით ვიბრძოლეთ, რომ გუნდში ზურიკო შეგვენარჩუნებინა. მან დღეს აჩვენა, რატომ იყო ეს სწორი გადაწყვეტილება — ენერგია, სისწრაფე და შედეგიანობა, რასაც ჩვენ ველოდით“ – აღნიშნა ჰორნელანმა.

დავითაშვილი უახლოეს დღეებში საქართველოს ეროვნულ ნაკრებს შეუერთდება და მონაწილეობას მიიღებს მსოფლიოს 2026 წლის ჩემპიონატის შესარჩევ შეხვედრებში ესპანეთისა და თურქეთის წინააღმდეგ. მისი მიმდინარე ფორმა იმედს აძლევს ქართველი გულშემატკივარს, რომ შემტევი ნაკრებში იმავე სისწრაფით და სიზუსტით გააგრძელებს თამაშს, როგორც „სენტ ეტიენში“.